Aqrar

Aylıq vəsait qarşılığında bitkilərə qulluq - YENİ LAYİHƏ

Aylıq vəsait qarşılığında bitkilərə qulluq - YENİ LAYİHƏ | FED.az
13:28 24 Aprel 2020

Azərbaycan Respublikasının Kiçik və Orta Biznesin İnkişafı Agentliyi (KOBİA) və “Bakı Abadlıq Xidməti” MMC birgə yeni layihəyə - “Çiçəklənən Abşeron” layihəsinə başlayıb.

Eləcə də bax: Biznesini inkişaf etdirmək istəyənlərin - NƏZƏRİNƏ

KOBİA-dan FED.az-a daxil olmuş məlumata görə, layihənin məqsədi ölkəmizdə uğurla həyata keçirilən özünüməşğulluq siyasəti çərçivəsində yerli əhalinin daha çox gəlir əldə etməsinə dəstək olmaqla, ailə təsərrüfatlarının inkişafına töhfə verməkdir. Bu məqsədlə Abşeron yarmadasında yerləşən kənd və qəsəbələrin sakinlərinə yaşıllıqların artırılması və kənd təsərrüfatı emalı sahəsinin inkişaf etdirilməsi üçün bitkilər (lavanda və bibəriyyə və s.) verilir. Hər bir ailə onun üçün müəyyən edilmiş aylıq vəsait qarşılığında bu bitkilərə qulluq edir. Bitkilər 6-12 ay müddətində ailələrdən geri götürülərək yeniləri ilə əvəz olunur.

Artıq KOBİA-nın dəstəyi, “Bakı Abadlıq Xidməti” MMC və “BİRGƏ” MMC-nin koordinasiyası ilə Balaxanı qəsəbəsində yaşayan 250 ailəyə 85000 bitki (lavanda və bibəriyyə) verilib. Ailələrin hər biri layihə çərçivəsində 250 - 1000 arası bitkiyə qulluq etməkdədir.

“Çiçəklənən Abşeron” layihəsinin növbəti mərhələsi Xəzər Rayon İcra Hakimiyyətinin dəstəyi ilə Zirə qəsəbəsində həyata keçirilib. Layihə çərçivəsində qəsəbədə yaşayan 200 ailənin hər birinə 250 - 1000 arası lavanda və bibəriyyə bitkiləri verilib.  

Layihə çərçivəsində becərilən bitkilərin abadlıq işlərində istifadəsi ilə yanaşı, sonrakı mərhələdə emalı, müxtəlif kosmetik və farmaseptik məhsulların və yağların istehsalında istifadəsi, xammal kimi ixracı nəzərdə tutulur.

Koronavirus pandemiyası ilə bağlı mövcud karantin şəraitində “Çiçəklənən Abşeron” layihəsinin əhəmiyyəti həm də ondan ibarətdir ki, ailələr yaşadıqları evləri tərk etmədən, öz həyətyanı sahələrində bitkiləri yetişdirməklə əlavə gəlir əldə edəcək və bununla da ailə büdcələrinə dəstək olacaqlar.

Gələcəkdə layihənin əhatə dairəsinin genişləndirilməsi nəzərdə tutulur.

Digər xəbərlər