Biznes

Azərbaycanda premium çayın yığımına başlanılıb - 2 MİN MANATA SATILIR

Azərbaycanda premium çayın yığımına başlanılıb - 2 MİN MANATA SATILIR | FED.az
19:49 4 May 2020

Lənkəranda iri təsərrüfatlardan olan “Yaşıl çay” fermer təsərrüfatında mövsümün ilk yaşıl çay yarpağının yığımına başlanılıb. Yığımı yüksək keyfiyyətlə və optimal müddətdə başa vurmaq üçün təsərrüfatın çaybecərənləri plantasiyalara cəlb olunublar.

Eləcə də bax: Azərbaycanda ən çox içilən çay markaları - MƏLUM OLUB - SİYAHI

FED.az "azərtac"a istinadən xəbər verir ki, İstisu qəsəbəsində yerləşən ümumi sahəsi 70 hektar olan təsərrüfatda “Azərbaycan-2” adlanan premium keyfiyyətli çay yığılır. Azərbaycanda ən yüksək keyfiyyətə malik olan bu yerli çayın yarpağının dəriminə sübh tezdən başlanılır. Bu il havaların bir qədər yağıntılı keçməsi çay yığımını qismən gecikdirib. Buna baxmayaraq, may ayında sahələrdən bol məhsul toplanacağı proqnozlaşdırılır.

Təsərrüfatın rəhbəri Araz Yağubov deyir ki, yığım hər il olduğu kimi, bu il də intensiv aparılacaq. Plantasiyadan bol məhsulun götürülməsi isə may ayının ortalarına proqnozlaşdırılır.

Mövsüm ərzində keyfiyyətli məhsul toplanılması üçün sahələrə bütün aqrotexniki qulluq göstərilib. Həmişə olduğu kimi, bu dəfə də insan sağlamlığına zərərli olan kimyəvi qatqılardan istifadə edilməyib.

“Biz bu ərazini tam orqanik saxlamışıq. Burada heç bir mineral və ya digər kimyəvi gübrələrdən ümumiyyətlə istifadə etməmişik. Bütün aqrotexniki işlər tam qaydasında aparılıb”, - deyə A.Yağubov əlavə edib.

Yığılan çayın kiloqramı 2000 manata alıcılara təklif olunur:

“Xarici turistlər üçün xüsusi hazırlanmış “Premium gold” çaylarımız da var. Onun 1 kiloqramı 2 min manatadır. Həm keyfiyyətinə, həm də qablaşdırmasına görə fərqlənir. Qablaşdırılması kitab formasındadır və səhifələrində Azərbaycan, ingilis və rus dillərində Azərbaycan çayı haqqında məlumatlar yazılıb”.

Sahələrdə çay yığmının ilkin mərhələsi olduğu üçün hazırda burada 20-yə yaxın işçi çalışır. Kifayət qədər təcrübəli olan çaydərən qadınlar məhsulun itkisiz və keyfiyyətlə toplanılmasına xüsusi diqqət yetirirlər.

Çay plantasiyalarında yığım sentyabr ayına qədər davam edəcək.

Digər xəbərlər